Косово утре за првпат ќе спроведе парламентарни избори на целата територија, вклучувајќи ги и четирите општини со мнозинско српско население во северниот дел од земјата.
Право на глас имаат 1.782.454 бирачи, што е за околу 40.000 граѓани повеќе отколку што Косово има жители, според пописот спроведен во 2011 година, објавува Танјуг.
За 120 -те места во парламентот ќе се борат 30 политички субјекти, меѓу кои и пет српски.
Политичките партии за да имаат пратеници во парламентот треба да го минат цензусот од пет отсто, додека за коалициите цензусот изнесува седум проценти од бројот на гласачите кои го оствариле своето право.
Малцинските заедници имаат 20 загарантирани места, од кои 10 ќе им припаднат на Србите, а останатите десет на другите национални заедници во Косово.
Регионалниот шеф на Косовската полиција, Жељко Бојиќ истакна дека регионалната косовска полиција „Митровица-Север“ изработила оперативен план со кој е предвидено ангажирање на 476 полициски службеници за време на парламентарните избори, пренесува Танјуг.