Јас имам став нулта толеранција за корупција и извршување на задачите согласно сите правни и законски процедури и тоа ќе инсистирам, доколку се разбира бидам избран за претседател на СДСМ, да биде практицирано и спроведувано од сите, а корупцијата да биде санкционирана согласно сите законски одредби, коишто важат во државата, истакна заменик министерот за финансии Димитар Ковачевски за „Утрински брифинг“.
Тој нагласи дека корупцијата е лоша за целото општество, не само од аспект на злоупотреба на некоја положба, меѓутоа и од аспект на намалување на конкурентноста во економијата, од аспект на намалување на слободите.
Борбата против корупцијата ја сметам за врвен приоритет на државата, нагласи Ковачевски додавајќи дека од една страна се системските промени кои што се прават преку владата во министерството за правда и во поврзаните институции, во унапредувањето на правосудниот систем, меѓутоа од друга страна постојат и независни судски органи, бидејќи судството е посебна власт, постои обвинителство кое е во хиерархија на собранието.
Сите мора да ја зголемат својата ефикасност во справувањето со корупцијата, порача заменик министерот за финансии Димитар Ковачевски за „Утрински брифинг“.