Премиерот Димитар Ковачевски и премиерот на Црна Гора, Здравко Кривокапиќ денеска во Лондон остварија средба, на која ја потврдија силната посветеност на двете земји за уште поинтензивна соработка, која после сојузништвото во НАТО е упатена кон заедничките ЕУ перспективи.
Како што соопштија од владината прес-служба, за време на разговорот со својот колега од Црна Гора, премиерот Ковачевски ја нагласи потреба од заедничкото учество во унапредување на регионалната соработка со цел обезбедување европска перспектива за двете држави, напредок, стабилност и подобра иднина за граѓаните на Западен Балкан.
Двајцата премиери се согласиле дека двете земји ќе ги искористат потенцијалите за зголемена соработка во областа на туризмот со цел заеднички економски бенефит.Како земји членки на НАТО, премиерите на Северна Македонија и Црна Гора, Ковачевски и Кривокапиќ ја осудуваат воената агресија на Русија против Украина и ја оценија како кршење на меѓународното право и како закана за глобалната безбедност.
Ковачевски денеска во Лондон оствари средба и со претседавачот на Советот на министри на Босна и Херцеговина, Зоран Тегелтија.
Двајцата соговорници ја споделија заедничката подготвеност за унапредување на билатералните односи на високо и највисоко ниво, за натамошно продлабочување на соработката во сите сфери од заемен интерес, пред сé за унапредување на соработката на економски план.
– На средбата во Лондон, премиерот Ковачевски и претседавачот со Советот на министри на Босна и Херцеговина, Зоран Тегелтија, се заложија да ја забрзаат постапката за потпишување на Договорот за економска соработка, Договорот за соработка во туризмот, како и Меморандумот за соработка во областа на младинските политики, се вели во соопштението.