Премиерот Димитар Ковачевски и министерот за внатрешни работи Оливер Спасовски денеска го презентираа буџетот на МВР за 2023 година. Ковачевски најави дека со зголемувањето од 6 отсто, идната година буџетот на ова министерство ќе изнесува 182,7милиони евра кои се за модернизација, и подобри услови за работа на полицијата.
„Темелот на нашиот безбедносен систем е добро подготвена и добро опремена полиција. Нема да запреме со редовна исплата на плати и бонуси на полицајците, со купување нова опрема, а ќе продолжи и реновирањето на објектите“, рече тој.
И во овој буџет е планирана ставка за исплата на бонус плати за 2022 година, за остварени над 150 часа прекувремена работа на годишно ниво. Со години наназад на полициските службеници, бонус платите не им се исплаќаа, за што тие поднесуваа тужби, а државата плаќаше отштета. Но сега е сменета таа практика, и како што нагласи Ковачевски досега се исплатени заостанатите неисплатени бонус плати и редовно е продолжено со нивно исплаќање за 2017, 2018, 2019, 2020 и 2021 година.
„Владата се стреми и работи за што побрзо членство на Северна Македонија во ЕУ, затоа ни е обврска секој полицаец да се почувствува уште повеќе ценет во општеството, со подобри шанси за квалитетен живот, но и подобри и поквалитетни услови за работа, како европските стандарди“, вели шефот на Владата.
Средствата се планирани и за набавка на нов систем за идентификација на траги од папиларни линии од прсти и дланки со кој ќе се надгради ефикасноста на Одделот за криминалистичко технички испитувања и вештачења и за дигитализација на форензика.
Ковачевски посочи и дека се реконструирани 78 објекти и дека се почнати подготовките за реконструкција на Центарот за обука во Идризово, а продолжува и реконструкцијата на Управните служби во зградата на Националната радиотелевизија.
