На прогамата на КРИК фестивалот за критичка култура, денеска почнуваат и презентациите и работилниците под заеднички наслов „Поетики на радикалното издаваштво“ во организација на Мултимедијален институт kuda.org од Нови Сад и на Контрапункт од Скопје.
Еден од централните настани на фестивалот, предавањето на светски познатата теоретичарка Светлана Слапшак ќе се одржи во 19, 30 часот во Чифте амам, по што ќе следи и разговор со неа, кој ќе го води Ана Вујановиќ, независен културен работник во полето на современите перформативни уметности и културата, која живее и работи во Берлин.
Денеска започна и дводневната меѓународна конференција „Дијаспора / Мобилност / Номадизам / Различности“, во организација на Есперанца – Светски културен центар.
– Проектот Од дијаспора до различности беше инспириран од потребата за ново разирање на дијаспората во контекст на променетиот амбиент на зголемена мобилност, глобализација и на различни начини на искусување на културните различности. Миграцијата е заедничка точка на културата на Балканот, но и на светот. Она што ни е една од целите на овој проект кој започна пред повеќе од две години, е да ги истражиме новите концепти на дијаспората и потребата да се напуштат застарените поими за дијаспората дека луѓето одат некаде и го редефинираат својот идентитет. И пораката до нашите политичари би била да заврши таа практика на сентиментализација на дијаспората и потоа злоупотребата што потекнува од таа сентиментализација, рече Алаѓозовски на отварањето на конференцијата.
Еден од партнерите на овој проект е една од најактвините независни културни инстиуции во регионот, „Ремонт“ од Белград и директорката Дарка Радосављевиќ за значењето на новиот фестивал КРИК рече дека е од исклучително значење што тој ги собра на едно место луѓето не само од регионот, туку у пошироко од Европа.
– Тоа има огромно влијание на различни нивоа, прво заради тоа што отвора простор за здрава комуникација на луѓе што слично ги промислуваат актуелните проблеми и се среќаваат со различни видови на изрази, иницијативи, мислења кои, колку и да се слични сепак се и различни и таа интеракција и размена е значајна, пред се’ за самите учесници на овој фестивал, а од друга страна, енергијата која тука се акумулира, едноставно мора да се пренесе на публиката и на сите заинтересирани кои доаѓаат овие денови во Чифте амамот каде што толку многу различни работи се случуваат и можат да се видат и слушнат, вели Радосављевиќ.
По денешните излагања на Моника МокреАлександра Лазар., Лидија Димковска, Елизабета Шелева, Мелентие Пандиловски (скајп врска-Австралија)Јане Чаловски и Сабина Габиќ, конференцијата продолжува и утре во Чифте амам, со почеток од 10 часот на која ќе зборуваат Ивајло Дичев, Ирена Беќиќ, Аријан Лека, Драгослав Дедовиќ, Лилјана Смиќ Деру и Марко Стаменковиќ.
Синоќа во Чифте Амам на КРИК фестивалот за критичка култура беа отворени две меѓународни изложби директно поврзани со тематските фокуси на годинешното прво издание. На изложбата „Архиви на насилство“, учествуваат седум уметници од Македонија и од Германија, Хрватска и Турција: Соња Шонбергер, Мишел Теран, Христина Иваноска, Ѓорѓе Јовановиќ, Memory of the world (Томислав Медак и Марсел Марс) и Зејно Пекунлу.
– Заедницата која се заснова врз култура на критичко дејствување и соочување преку конфронтација, е заедница на слободата, на взаемноста, на храбрата пловидба кон новите хоризонти на општеството. Оваа приказна ја започнуваме во миг кога на нашето општество му е потребна една таква нова пловидба. Потребно му е ново пријателство за јавно добро, потребно му е ново втемелување, ново поврзување на сите расцепкани и прекинати врски. Потребно е градење платформа, платформи кои ќе создаваат органски и конструктивни кртички јадра, низ кои ќе се втакјуваат различните општествени слоеви и интереси, ќе се преиспитуваат можностите и границите. КРИК ќе застанe во одбрана на правото на критичка култура, која постојано ќе ги поместува границите на еманципаторските политики во социо-културниот простор, рече Искра Гешоска, претседателка на Контрапункт.
На отварањето се обратија и Елена Велјановска, кураторка на изложбата „Архиви на насилството“, Роберт Алаѓозовски, претседател на Есперанца, кој е организатор на изложбата „Од дијаспори до различности“ и кураторот Мирослав Кариќ од Белград
– Секое од делата на оваа изложба отвара нови аспекти на значењето на миграциите и дијаспората, а сите од уметниците застапени на изложбата почувствувале лично што значи да се биде во дијаспора. Тука се зборува и за мигрнтите како еден д најгорливите проблеми на Европа сега, рече Кариќ.
На оваа изложба презентирани се делата на: Ивана Ивковиќ, Рајко Радовановиќ, Младен Бундало, Нада Прља, дИСТРУКТУРА. Изложбата е дел од регионалниот проект „Од дијаспора до различности“.