Меѓународната федерација на новинари (IFJ) и нејзиниот европски отсек, Европската федерација на новинари (EFJ), го осудија продолжувањето на притворот на македонскиот новинар Томислав Кежаровски. Реакцијата доаѓа откако судот вчера го продолжи времетраењето на притворот за новинарот за дополнителни 30 дена.
>> ОБСЕ со критики за продолжувањето на притворот за Кежаровски
„Ние сме многу загрижени поради продолжувањето на притворот за нашиот колега Томислав Кежаровски и безрезервно ја осудуваме одлуката на судот во Македонија да го задржи дополнителни 30 денови“, изјави претседателот на IFJ Џим Бумелха. „Држењето во притвор ги поткопува неговите права и слободи како новинар, но и го става под прашање почитувањето на правото на слобода на изразување и информирање воопшто во Македонија“, додаде тој.
„На скоро одржаниот Светски конгрес на IFJ во Даблин беше усвоена резолуција, која беше предложена од ССНМ и поддржана од Здружението на новинари на Македонија (ЗНМ) како и други организации. Со резолуцијата им се дава целосна поддршка на Кежаровски и ССНМ во нивната борба за медиумска слобода“, рече Бумелха.
>> СЕЕМО: Притворот на Кежаровски го вклучи алармот
Македонската полиција го уапси новинарот на весникот Нова Македонија во мај годинава. Оттогаш тој е во притвор во скопскиот затвор Шутка.
„Ние целосно безусловно го поддржуваме правото на Кежаровски да не го објавува својот извор на информации. На новинарите мора да им биде дозволено да спроведуваат новинарски истражувања за проблеми кои се од јавен интерес. Мора да можат да го прават тоа слободно, без закана од затвор или под притисок да го објават својот извор на информации“, изјави заменикот претседател на EFJ Надежда Ажгикина.
>> Медиумите од Југоисточна Европа бараат слобода за Кежаровски