Известувачот за Македонија во Европскиот парламент, Илхан Ќучук, рече дека никој нема интерес да се запре евроинтеграцијата на Македонија, но дека постигнаувањето на високите цели бара консензус во ЕУ.
-Во државните спорови нема добитници. Нема лесен разговор за историјата и никогаш немало, но тој бара и поглед кон иднината и стратегиските цели. Стратегиска цел на Република Северна Македонија е таа да биде во ЕУ, а тоа е интерес и на Бугарија. Затое потребен разговор и навраќање на Договорот од 2017 година бидејќи дијалогот меѓу двете земји е нарушен. Се надевам дека на средбите овде ќе биде потврдена силната проевропска ориентација, бидејќи ова може да биде силна година за Република Северна Македонија во Европската унија, рече тој додавајќи дека целта му е во извештајот за прогрсот на Македонија во ЕП да стои ставот дека е неопходно да биде отворена преговарачката рамка и да се одржи првата меѓувладина конференција.
Запрашан дали, според него, историјата треба да влезе во преговарачката рамка тој одговори дека за такви прашања треба да расправаат компетентни историчари и дека тој нема намера да го решава тоа бидејќи не е специјализиран за такви теми. Но, нагласи тој, треба да се донесат и политички одлуки бидејќи не може сите да ги ставаат овие прашања под тепих и да кажат тоа е проблем на историчарите.
Резолуцијата на ЕП, додаде тој, нема обврзувачки карактер, но е најшироката форум и го преставува силниот глас на европските граѓани.
Околу конференцијата на која ќе се расправа за иднината на ЕУ тој порача дека треба да има место и за земјите од Западен Балкан и дека тоа ќе биде дел од извештајот за напредокот на Македонија што е пред гласање во ЕП.
Министерот за надворешни работи Бујар Османи оцени дека посетата е важна за нас бидејќи претстои гласање за резолуцијата за Македонија во ЕП.
-Не очекувам ништо повеќе од она што е реално и видливо. Македонија испорача на сите полиња и заслужува вреднување на напредокот, му порача министерот на европарламентарецот.
Тој нагласи дека со гостинот го отвориле и прашањето за нашите односи со Бугарија при што порача дека, и покрај разочарувањето во нашата земја, со несмалено темпо продолжува политичкиот дијалог и очекува дека со посветна работа ќе ја вратиме довербата, рече Османи.