Тројцата пратеници олеснувачи од Европскиот парламент – Едвард Кукан, Иво Вагјл и Ричард Ховит – очекуваат да се воспостави дијалог на највисоко ниво можно ниво за да се реши политичката криза во земјата. Овој нивен повик значи дека тие очекуваат Никола Груевски и Зоран Заев да седнат на иста маса и да ја извлечат земјата од криза.
Во своето соопштение тие пред се изразуваат сочувство со семејствата на загинатите припадници на полицијата и загриженост од настаните во Куманово:
“Ние сме длабоко загрижени поради настаните во Куманово овој викент. Ние ги осудуваме сите насилни акции против јавниот ред и обидите да се дестабилизира ситуацијата во земјата.
Сакаме да го понудиме нашето сочувство до семејствата на луѓето кои ги загубија своите животи овој викенд. Овие настани мораат да бидат јасно и транспаретно истражени во согласност со владеењето на правото. Сакаме исто така да ја повикаме македонската јавност да не дозволи понатамошна ескалација на тензиите.
Ги повикуваме сите политички лидери во земјата да се однесуваат одговорно и да се воздржат од изјави кои би можеле да ја нарушат стабилноста на земјата. Уште еднаш повторуваме дека сите обвинувања за малверзации кои беа јавно објавени мораат да бидат серизно истражени а оние за кои ќе се утврди дека се одговорни треба да понесат одговорност за нивните дела, со целосно почитување на принципите на транспаретност, непристрасност и почитување на презумпцијата на невиност.
Ние исто така бараме од политичките партнери да ги зајакнат напорите за сериозен ангажман во политички дијалог на највисоко можно ниво за да се реши политичката криза. Ние сме подготвени да продолжиме да даваме наша поддршка и олеснување на дијалогот кој треба да води кон намалување на политичките тензии и решавање на недостатоците на политичкиот систем во Македонија. Наша заедничка е да ја видиме Македонија назад на патот кон евро-атлантска интергација”, велат тројцата европски пратеници.
Во текот на март и април овие тројца олеснувачи на дијалогот помеѓу СДСМ и ВМРО-ДПМНЕ во два наврати се сретнаа со претставници за двете партии но третата рунда се уште не е закажана. Според дипломатски извор во Европскиот парламент се прават обиди овој дијалог на продолжи помеѓу Груевски и Заев заедно си тројцата европски пратеници.