Изминатата ноќ непознати сторители со спреј испишале погрдни и навредливи натписи на неколку месни штабови на СДСМ во Прилеп.
Мета биле месните штабови во урбаните заедници Корзо и Тризла 2. Освен тоа на штабот на СДСМ во населбата Точила исцртани се и кукасти крстови, покрај кој е напишан редниот број на претседателскиот кандидат на ВМРО-ДПМНЕ, Ѓорге Иванов.
Во Општинската организација на СДСМ во Прилеп велат дека синоќешниот вандализам е кулминација на нервозата во редовите на ВМРО-ДПМНЕ, предизвикана од средбите кои Заев и Шекеринска во саботата ги имаа со граѓаните на Општина Прилеп.
– Фашистичките симболи и кукастите крстови го покажуваат вистинското лице на нарачателот на овие вандалски дела. Прашуваме, ова ли се делата на активистите од редовите на владејачката ВМРО-ДПМНЕ и што значи испишувањето на редниот број на нивниот кандидат за претседател Иванов до кукастиот крст? – прашаа прилепските социјалдемократи.
Од Општинската организација на СДСМ упатија апел до надлежните во Полициската станица во Прилеп, да ги преземат сите законски мерки во насока на што поскоро откривање на сторителите.