Официјална Москва негира дека Едвард Сноуден влегол на нејзина територија, што само ја зголеми нејаснотијата каде точно се наоѓа поранешниот работник под договор на американското разузнавање, кого властите во САД го бараат поради обвинение за шпионажа.
Според информациите Сноуден вчера пристигнал во Москва од Хонг Конг со патнички авион.
Претходно, тој се засолни во Хонг Конг откако за медиумите откри дека американската влада преку две програми тајно следела телефонски и Интернет-податоци, а обелодени и други доверливи разузнавачки информации.
Рускиот министер за надворешни работи Сергеј Лавров денеска изјави дека немаат информации за движењето на Сноуден.
Тој негираше секаква руска вмешаност во патните планови на Сноуден и револтирано ја отфрли американската критика за Москва во врска со инцидентот како неоснована и неприфатлива.
Американскиот државен секретар Џон Кери вчера побара Русија да го испорача Сноуден, предупредувајќи на негативни последици доколку не се согласи на тоа.