Обреновац е град на духови, во него нема живот. Освен неколку стари луѓе и хотелот каде што е сместен кризниот штаб, во градот практично нема ништо. Ова за НОВА го изјави Владимир Лазаревик кој е дел од тимот на мисијата на СЗО за поплавените подрачја во Србија.
-Во Обреновац нема канализација и одвод. Градот е во очајна состојба. Потребна е голема хуманитарна помош кој треба правилно да се насочи. СЗО може да помогне со техничка помош и да направи проценка каде треба да се фокусираат приоритетите, изјави Лазаревик.
Тој е дел од тимот што ќе работи неколку месеци на терен и треба да направи извештај кој ќе биде доставен до Владата и Министерството за здравство на Србија.
Од друга страна српските медиуми јавуваат дека рокот за проценка на штетата од локалната самоуправа истекол вчера на 30 мај, а податоците се уште се обработуваат.
Штабот за вонредна состојба во Чачак го усвоил прелиминарниот извештај за штетата од поплавите според кој, вкупната штета изнесува повеќе од 1, 7 милијарди динари. Во Косјериќ штетата е проценета на 580 милиони динари, во Ваљево на 950 милиони динари , а во Пожега 145 милиони динари.
Во Босна и Херцеговина две недели по полавите голем број луѓе се уште не можат да се вратат во своите домови.
Медиумите јавуваат дека голем дел од хуманитарната помош не може да стигне до луѓето, поради проблеми со административните процедури на граничниот премин Орашје.
На царинскиот терминал се наоѓаат десетина камиони со хуманитарна помош
од Клагенфурт, која не може да помине поради административни органичувања.
На една од пратките пишува дека примач е Каритас, но не било прецизно назначено„ Каритас на Врхобосанска надбискупија, канцеларија во Брчко.
Последиците од поплавите во овој дел на државата се проценува на милион марки, а се апелира на достава на храна и средства за хигиена. .