Македонски лекари ќе се обучуваат на Католичкиот универзитет „Свето срце“ при болницата „Агостино Џемели“, во Рим која е официјалната болница на Поглаварот на Римокатоличката црква.
Денеска беше потпишан Меморандумот за разбирање меѓу министерот за здравство Никола Тодоров и деканот на Факултетот за медицина и хирургија при Католичкиот Универзитет „Свето срце“ Роко Доменико Алфонсо Белантоне, со кој се овозможува соработка во областа на интерната медицина, дигестивна ендоскопија, хирургија, педијатрија, гинекологија и акушерство, анестезиологија, неврохирургија, ортопедија, офталмологија, неврологија, радиологија, нуклеарна медицина, урологија и други.
– Со ова се отвара голема можност за македонските лекари кои имаат можност и привилегија да се стекнат со најсовремени знаења и вештини од медицинат изјави Тодоров.
Досега во оваа болница се обучувале тројца македонски лекари од областа на гастроентерохепатологијата, а следната фаза ќе биде обука од областа на хирургија на тиреоидеја, а деканот Белантоне е првиот во светот кој го применил овој метод.
Деканот Белантоне, изрази задоволство за отпочнувањето на оваа соработка, зад која стои и ректорот на Католичкиот универзитет во Италија.
– Се надевам дека во скоро време ќе ги видиме лекарите кои ќе дојдат кај нас, а и нашите лекари кои ќе дојдат кај вас. Имаме две заеднички култури од Александар Велики до Јулиј Цезар и во овој момент време е да ги споиме овие култури изјави Белантоне.
На чинот на потпишување на Меморандумот за разбирање присуствуваше и проф. по хирургија и гастрентеро-хепатологија Гуидо Костамања, кој заедно со Белантоне беа во тимот кој го оперираше Папата Јован Павле Втори. Тој појасни дека можностите за воспоставување на соработката биле разгледани лани во Рим за време на неговата средба со министерот Тодоров.