Државниот санитарен и здравствен инспекторат денеска информираше дека лекарите и другите вработени во болниците не го почитувале работното време ова било утврдено по вонредниот инспекциски надзор, кој инспекторите го направиле во петокот, од 14 до 15.30 часот.
Директорот на Државниот санитарен и здравствен инспекторат, Џевџес Шаќири, информира дека инспекциски надзор бил извршен во Клиниката за дерматологија, за гастроентерохепатологија, за ендокринологија, дијабетес и метаболички нарушувања, за ревматологија, за очни болести, за неврологија, во Стоматолошкиот клинички центар, во Клиниката за уво нос и грло и во Градската болница „8-ми Септември“.
„Од извршениот увид, непочитување на работно време од страна на вработените во јавните здравствени установи е констатирано на Клиниката за дерматологија, Клиниката за ревматологија и Клиника за гастроентерохепатологија. Во останатите клиники (ОРЛ, Стоматологија, Неврологија, Очно, Ендокринологија и ГОБ „8-ми Септември“) констатирано е почитување на работно време на вработените. При овие вонредни надзори, покрај отсуство на вработени, констатирано е и отсуство на дел од менаџерите во неколку ЈЗУ“, рече Шаќири.
На Дерматологија, од вкупно 68 вработени, во петокот, по распоред требало да биде присутен 41 вработен, но инспекторите не нашле на работа двајца вработени, шалтерски службеник и транспортер. На Клиниката за гастроентерохепатологија отсутен бил вработен во одделот за финансии, одговорен за електронската листа за редовност.
„На Клиниката за ендокринологија, дијабетес и метаболички нарушувања сите вработени се затекнати на своите работни места- рече Шаќири.
На Клиниката за ревматологија во периодот на вонредниот инспекциски надзор не биле присутни доставувач, секретар и сметководител, а на Очната клиника, на работа биле затекнати сите вработени.
На Неврологија, каде сите вработени биле на своите работни места, додека хигиеничарите и болничарите биле 30 минути на своите работни места пред останатиот медицински персонал. И во Стоматолошкиот клинички центар немало отсуство од работа.
На Клиниката за уво нос и грло на работното место биле затекнати 52 вработени лица, а слободни, поради дежурство, биле шестмина. Двајца вработените биле по нивно барање, ослободени од директорот, а останатите, кои биле електронски евидентирани, биле на работното место.
Во вонреден инспекциски надзор извршен во четвртокот од 17.30 до 20 часот, во „8-ми Септември“, сите вработени, без исклучок, биле на работа.
„За сите констатирани непочитувања на работното време од страна на ДСЗИ ќе бидат известени директорите на здравствените установи, додека за непочитување на работното време од страна на директорите ќе биде известен кабинетот на министерот за здравство“, најави Шаќири.