Државниот санитарен и здравствен инспекторат денеска затвори две приватни здравствени установи, бидејќи во нив двајца лекари од скопските клиники вршеле допoлнителна дејност, а не биле регистрирани за тоа.
Станува збор за приватната дијагностичка лабораторија Хистолаб каде што професор од Клиниката за Онкологија доаѓал да работи дополнително во попладневните часови, отако ќе му завршело работното време на клиниката. Од инспекцијата признаваат декa лекарот не го затекнaле таму, но од медицинската документација заклучиле дека тој таму врши анализи.
Во ПЗУ Промедика била затекната лекарка од Клиниката за пластична хирургија која прегледувала исто така после работното време. По ова лекарите ќе добијат забрана за вршење на дополнителна дејност, а здравствените установи ќе бидат затворени.
-Здравствените установи ќе бидат затворени до 30 дена, а ќе биде поднесена и прекршочна пријава. По истекот на овој рок ќе се одлучи што понатаму, изјави Џевџес Шакири директор на ДСЗИ.
Според Шакири, двајцата лекари биле пријавени телефонски во ДСЗИ. Професорот кој бил откриен во Хистолаб во декември минатата година се закани дека ќе си оди од Клиниката за онкологија, посочувајќи на многу неправилности во работењето. Тој тогаш беше револтиран бидејќи бил казнет од плата, а според проектот „плаќање по учинок’ наводно не направил доволно здравствени услуги.
Тој е единствениот хистопатолог во државата, го има товарот на најголем број од анализите , а обучува и тројца специјализанти бидејќи на клиниката нема доволно лекари кои ја работат оваа проблематика. Станува збор за исклучително важни анализи со кои се дијагностицира и потврдува присуството на карцином во организмот, за кои не смее да се чека многу бидејќи болеста напредува.