Лекарите од Градската општа болница“ 8 Септември“категорички демантираат дека внесувале повеќе интервенции од што направиле откако министерот Тодоров ги обвини дека ги лажирале податоците за проектот “плаќање по учинок“.
Тие тврдат дека инспекторите при контролите не ги користеле целосните податоци, туку само дел од нив кои што се внесени во информатичкиот систем. Лекарите велат дека има податоци кои се внесувани рачно во записниците и бараат утре изутрина инспекторите повторно да дојдат во болницата и да си ја завршат работата што не ја сработиле.
-Не е точно дека има лажирање на бодовите. Податоците кои ги изнесе министерот Тодоров се паушални и не се точни. Ние ги проверивме податоците особено на гастроентерхепатологија и утврдивме дека има неевидентирани податоци од страна на контролорите велат за НОВА лекари од болницата.
Дознаваме дека Тодоров се согласил и утре изутрина инспециските служби повторно ќе контролираат во оваа болница. Неофицијално, Тодоров дури се заканил дека ќе го разреши и директорот доколку се докаже дека 70 проценти од лекарите ги лажирале податоците.
Од друга страна доцна попладне пристигна реакција од министерот Тодоров во која вината за бурната реакција од оваа болница ја фрли врз дел од медиумите за кои тврди дека не ги пренеле информациите како што треба.
-Апелираме до сите медиуми при известувањето за актуелната состојба информациите да ги пренесуваат во целост и во духот во кој се дадени, да не се вадат од контекс со што се доведуваат во заблуда граѓаните и се создава непотребен револт кај здравствените работници и пациентите се вели во соопштението на Министерството за здравство.
Од таму потенцираат дека контролите не се насочени против лекарите туку за да се спречат можните штетни последици од неточното внесување на податоци.
Инаку, целата лавина започна откако една лекарка од очното оделение била пријавена од своите колеги дека внесувала лажни податоци. Раководството на болницата за НОВА го потврди случајот и откри дека и покрај предупредувањето таа несакала да ги коригира податоците. Станува збор за блиска роднина на актуелен директор на една клиника, реформатор и член на владеачката ВМРО ДПМНЕ.