Лекарската комора нема материјални средства, а нема ни законски можности да го штити докторот, ние само можеме да бараме од ресорното Министерство и од директорите во јавните и приватните здравствени установи докторот да се заштити, вели претседателот на Лекарската комора, Кочо Чакаларовски, по денешниот немил настан во кој пукано со пиштол беше во хирург.
Чакаларовски вели во конкретниот случај се работи за дело направено со премисла и напаѓачот сакал да се одмазди, односно да убие. Тој посочи дека Лекарската комора интензивно работи на изготовка на подобри закони со што докторот би бил заштитен на работно место.
– Доколку се докаже дека јас сум виновен што докторите се напаѓани затоа што организациски не сум ги заштитил нека кажат каде сме згрешиле (Лекарската комора) и во што. Во последните две години интензивно работиме на донесување на закон за доктори. Ние ќе инсистираме законот кој нашата комисија го изготвува, Министерството за здравство како интегрален текст да го прифати и да се изгласа, изјави првиот човек на Лекарската комора.
Како што објасни тој, во закон подетално ќе бидат обработени заштитата на докторот на работното место и ќе се зборува за минималната плата која треба да им се даде на лекарите.
Во однос на самиот напад, Чакаларовски рече дека според анкетите кои Лекарската комора ги спроведува, одамна лекарите подлегнувале на притисоци од страна на пациентите.
– Падната е почитта кон докторот во очите на граѓаните. Пред 20 години не се викаше, не се мавташе пред докторите а овде бевме сведоци да имаме билборди низ градот кои доведоа до деградирање на вредноста доктор. Јас ве уверувам дека македонските доктори не се лоши доктори, дополни тој.
Министерот за здравство пак, Никола Тодоров, денеска по настанот изјави дека чувствувал морална одговорност за секој настан што се случува во здравството и го осуди ваквиот, според него нецивилизиран потег, и вели дека ваков настан тешко може да се спречи.
– Не сум задоволен и не можам да бидам задоволен, затоа што нема човек што може да биде задоволен од кој било здравствен систем, здравствениот систем е жива материја и постојано има проблеми, поентата е дали тие проблеми се решаваат или не, а вакви немили ситуации имало и во минатото, има и денеска и треба да се осудат и виновниците, изјави Тодоров .
Како што дознава НОВА, во седум часот изутрина бил повикан синот на пациентката кој на клиниките дошол наоружан со пиштол. Влегол во кабинетот на хирургот Љубомир Огненовиќ кој го примил љубезно и се обидел да му објасни што се случило.
По ова, напаѓачот започнал да пука, го погодил докторот три пати во ногата, а медицинската сестра успеала да се спаси. Во лекарската соба биле испукани 5-6 куршуми кои завршиле во sидовите и во мебелот.