Молк во Лекарската комора откако во јавноста беше обелоденето дека лекари од САД ќе ги обучуваат македонските доктори но и верски ќе проповедаат. По ова експресно беше тргнат текстот кој беше објавен во американскиот магазин „Фејт“
НОВА побара став и толкување од Лекарската комора на ваквиот договор кој Министерството за здравство го склучило уште минатата година , но од таму ни беше кажано дека претседателот Кочо Чакаларовски и неговите заменици нема да бидат достапни до вторник. Нема коментар ниту од Македонското лекарско друштво.
Неофицијално дознаваме дека Министерството го елиминирала МЛД од целата работа и затоа кај нив не постои интерес за обуките на американските лекари.
Некои од лекарите на хируршките клиники велат дека знаат за мисијата на американските доктори која не е само од областа на медицината , туку дека ќе вршат и верска пропаганда, за што се платени од нивната Евангелистичка црква. Вкупно 69 доктори од САД треба да престојуваат во Македонија до крајот на годината.
На чело на тимот американски лекари и нивен духовен лидер е д-р Енди Сандерс. Тој исто така е и главен координатор на проектот преку кој македонското министертво за здравство ги носи странските лекари во земјата.
Скадалот изби кога во интервју за „Фејт“ Сандерс вели дека Христијанизирањето, на недопредниот македонски народ е неговата најнова мисија.
„Нашата молитва беше Господ да ни овозможи пријателства со неколкумина доктори, кои со тек на време ќе станат зрели и верни следбеници на Христос , како и водачи на делото на Божјото царство во Македонија“, вели американскиот доктор, кој во средата на заедничка прес-конференција со министерот Никола Тодоров најавија дека во септември ќе донесат нови 60 врвни специјалисти, кои ќе ги обучуваат лекарите во земјата.
„Досега сме работеле во многу земји и видовме здравствени системи од многу земји, но не на ваков начин како што работиме во Македонија. Она што министерот Тодоров го почна тука е навистина нешто многу уникатно, единствено. Овој проект е развиен врз основа на релациите меѓу специјалистите од Македонија и од САД“, рече Сандерс на прес-конференцијата.
Според американскиот магазин „Фејт“ тој на македонските власти јасно им дал до знаење која е неговата мисија. Владата се согласила, а соработката почнала во февруари 2013-тата.
„Господ ни даде две големи привилегии. Можност да влијаеме на здравствената заштита на една цела нација со подучување на новите техники и процедури кои ќе бидат дел од здравствениот систем. Втората и главна причина на оваа мисија е можноста да се донесе Евангелието не само до нацијата, туку и до нејзините лидери, кои имаат големо влијание како следбеници на Исус Христос.“
Во овој текст за најновата мисија на Сандерс, верскиот магазин дава и кус опис за религиската припадност на граѓаните во земјата.
„Северно од Грција, опкружена од Албанија, Србија и Бугарија, Македонија е независна држава само 20 години, таа дури и не се појавува на постарите географски карти. Се проценува дека Евангелски христијани има помалку од еден процент, додека муслиманите сочинуваат околу 30 отсто од населението. Христијанската медицинска и стоматолошка асоцијација „Августа“ верува дека донесувањето на Евангелието во оваа нација недопрена од Божјиот збор никогаш не било од поголема критичка важност за напредокот на Божјото царство во ова време.“
Сандерс во интервјуто за „Фејт“ изразува надеж дека еден ден ќе ги види своите колеги-доктори од Македонија како религиозно созреваат.