Лекарската комора на Македонија, најверојатно во вторник ќе се изјасни каков е став на оваа лекарска асоцијација по однос на спектакуларното апсење и затворската казна од една година за очниот хирург Дејан Ставриќ.
Иако, претседателот на комората Кочо Чакаларовски веднаш по апсењето на Ставриќ најави дека ставот ќе го оформат веднаш по пресудата, тоа не се случи. Од комората ни одговорија дека Чакаларовски е на службено патување, а заменик претседателот Џабир Бајрами замоли да не го прашуваме ништо, се до вторник кога ќе има редовен состанок на раководството на Лекарската комора.
– Ве молам не ме прашувајте ништо, кратко одговори Бајрами.
Ова не прв пат асоцијацијата која треба да ги штити интересите на лекарите да биде инертна или воопшто да нема став по однос за важни работи кои се однесуваат на нивните членови.
Ден по апсењето на Ставриќ кога НОВА побара став од Лекарската комора претседателот Кочо Чакаларовски беше зачуден од информацијата, рече дека првпат слуша за апсењето на познатиот офталмологот.
-Првапат слушам за апсењето, но велам, прво нека се испита случајот, нека се почитува „презумцијата на невиност“, а дури потоа комората ќе се изјасни, изјави тогаш кратко Чакаларовски.
Новоизбраниот лидер на Синдикатот Горан Беговиќ, вчера за НОВА изјави дека ќе застанат зад нивниот колега и доскорешен лидер, со финансиска, морална и правна помош доколку е потребно.
-Апсолутно сум против апсењето кое беше изведено спектакуларно и на тој начин пренесено во медиумите. Во останатиот, судскиот дел не можам да се мешам. Но, ние му даваме целосна подршка на Ставриќ како наш колега и поранешен лидер на Синдикатот на клиниките, изјави Беговиќ.
Во понеделникот на 26 мај, Ставриќ беше осуден на една година затвор и прогласен за виновен за сторено кривично дело примање на награда за противзаконито влијание. Пред два дена офталмологот беше пуштен во домашен притвор. Ставриќ на судењето рече дека ова е монтиран процес и најави борба во своја одбрана преку судскиот систем, а доколу тоа е потребно и во странство.