Зголемување на месечните примања на докторите во износ од две просечни плати за да се спречи заминувањето на младите лекари во странство. Ова е една од мерките за која ќе се заложи новото раководство на Лекарската комора во првите шест месеци од своето работење.
„Ќе издејствуваме преку Министерството и Фондот за здравство да се зголемат примањата во износ од две просечни плати, како една од мерките за да се спречи одливот на лекарите. Се надеваме ќе успееме во тоа“, изјави др. Илбер Бесими заменик претседател на Лекарската комора.
Она што најавија дека ќе го направат веднаш е ревизија на финансиското работење на досегашната работа комората.
Во приоритетите е и ревизијата на реформите кои беа донесени од министерот за здравство Никола Тодоров. Тоа се: Барање за укинување на проектот плаќање по учинок кој не донесе ништо добро ниту за лекарите ниту за пациентите, редефинирање на проектот „Мој термин“ и прилагодување на стандардите според СЗО, медицинскиот кадар да биде ослободен од административната работа, донесување на Законот за доктори во Собранието на РМ.
„Ќе го дооформиме тимот и прв чекор е ревизија на досегашното работење на комората. Ќе инсистираме на соработка со Фондот и Министерството за здравство за да ги реализираме сите овие работи“, изјави др. Калина Гривчева Старделова претседател на комората.
Во моментот на сметката на Лекарската комора новото раководство затекнало само 46 000 денари . Комората исплаќа два кредита. Едниот во вредност од 376.100 денари е за новиот простор за сала за конференции во центарот на градот. Откога увиделе дека не можат да го издржат финансискиот товар од овој кредит, старото раководство од комората го издало просторот за 1800 евра месечна кирија.
Со вториот кредит во износ од 317.663 денари комората ја отплаќа опремата во Симулацискиот центар на Министерството за здравство. Со парите на докторите старото раководство на сметката на Министерството за здравство уплатило 240 000 евра за „фантомите“(кукли) на кои учат студентите и се полагаат државните испити. Ова предизика голем револт кај лекарите, кои сметаат дека нема зошто комората да го финансира Министерството за здравство. За разлика од комората, министерството под чие владение е овој центар, за оваа намена потрошило само 120 000 евра.