Претседателот на Претставничкиот дом на американскиот Конгрес републиканецот Пол Рајан изјави дека нема да го брани републиканскиот претседателски кандидат Доналд Трамп по неговите коментари за жените кои предизвикаа широка осуда во земјата.
Рајан рече дека тој веќе нема да биде дел од кампањата на Трамп за изборите на 8 ноември. Тоа, како што прецизира, не значи дека тој ја повлекува и неговата поддршка за Трамп, но исто така и дека веќе нема да го брани. Трамп на ова преку Твитер му порача на Рајан дека не би требало да си го губи времето борејќи се за него.
Оваа изјава доаѓа по жестокиот втор ТВ-дуел меѓу претседателските кандидати Хилари Клинтон и Доналд Трамп.
На почетокот на дебатата, Трамп се обиде да ги одбрани изјавите обелоденети на видео материјалот од 2005-та година, објавен во петокот, а на кој, тој кажува непристојни коментари за жени. Трамп порекна дека бил дел од неподобни активности, дека е засрамен од изјавите, инсистирајќи дека има огромна почит спрема жените и дека е време да се дискутира за поважни работи.