Судскиот процес за случајот „Ликвидација“, во кој еден од осумте обвинети е и новинарот Томислав Кежаровски, започнува денеска во Кривичниот суд во Скопје.
Во судот се наоѓаат колегите новинари на Кежаровски кои бараат тој да брани од слобода, а потоа Судот да донесе правична пресуда.
„Не прејудицирајќи ја судската одлука, укажуваме дека Кежаровски ја вршел својата работа како новинар и пишувал за теми кои се од јавен интерес. Судот треба да ја има предвид функцијата на новинарството во едно демократско општество и каков ефект има притворањето на Кежаровски врз слободата на говорот и работата на другите новинари“, потенцираат од иницијативниот одбор Слобода за Кежо.
Судењето ќе го следат представници на ОБСЕ, Хелсиншкиот комитет и Американската амбасада.
Покрај Кежаровски на обвинителната клупа ќе седнат уште седум лица, меѓу кои судии, јавен обвинител и адвокат.
Кежаровски е обвинет за напишан текст објавен пред пет години во кој го открил идентитетот на заштитен сведок. Стнува збор за случајот Ореше односно убиството на Лазар Милошевски (74) во 2005 година во велешкото село Ореше. Во март годинава, тројцата обвинети беа ослободени од вина.