Обновување фасади во Центар, разубавување на зеленилото во Скопје, преку обнова на некогашното корзо во Ѓорче Петров па се економска зона во Делчево – продолжува кампањата за локалните избори.
Кандидатот за градоначалник на ВМРО – ДПМНЕ на Центар Владимир Тодоровиќ најави продолжување на проектот за реконструкција на фасади на станбени згради во општината.
– Мојата програма со која настапувам на овие избори содржи и обнова и реконструкција на фасадите во централното градско подрачје. Тој интензитет ќе го зголемиме така што во наредните 4 години некаде околу стотина згради ќе добијат нови фасади, изјави Тодоровиќ.
Проекти за враќање на зеленилото во Скопје, целосна контрола врз заштитата на природата и здравјето на граѓаните, најави денеска кандидатот за градоначалник на Скопје од СДСМ Јани Макрадули.
– Заштита на природата и преземање мерки за спречување на загадувањето на водата, воздухот, земјиштето, како и заштита од бучава и нејонизирачкото зрачење на подрачјето на градот Скопје се дел од законските ингеренции на градската администрација.
– Оваа и следната година ќе работиме на доизградбата на Градскиот парк во Ѓорче Петров. Ќе го обновиме шеталиштето кое беше препознатлив имиџ во минатото. За овој простор планираме да распишеме конкурс за идејно решение со што значително ќе се збогатат содржините во паркот, изјави кандидатот за градоначланик на општина Ѓорче Петров од ВМРО-ДПМНЕ Сокол Митревски денеска најави повторно заживувањето на препознатливото корзо во овој дел на Скопје.
Кандидатот за градоначалник на Град Скопје од ВМРО-ДПМНЕ Коце Трајановски, денеска го промовираше проектот за подобрување на водоснабдувањето во населените места Ченто, Стајковци, Синѓелик и Инџиково во Општина Гази Баба.
Кандидатот за градоначалник на општина Карпош од коалицијата „Сојуз за иднината“, Андреј Петров денеска претстави дел од неговата програма што се однесува на хортикултурното уредување во општината. Најави зачувување на зелените површини од, како што рече, хиперурбанизацијата на Карпош.
ГРУЕВСКИ НАЈАВИ ИЗГРАДБА НА ИНДУСТРИСКА ЗОНА ВО ДЕЛЧЕВО
– Во Делчево ќе се гради технолошка индустриска развојна зона (ТИРЗ) на 20 хектари државно земјиште. Ќе почне да се гради на крајот од оваа година, а се очекува да биде готова до 2015 година, најави премиерот и лидер на ВМРО-ДПМНЕ Никола Груевски при денешната посета на месноста Црна Скала, во близина на Делчево, каде ќе биде лоцирана зоната.
Тој беше и во Берово за да ја истакне поддршка за нов мандат на градоначалникот Драги Наџински.