Oд 27 октомври до 1 ноември во Младинскиот културен центар, РИЦ центарот во Зебра и Менада ќе се одржи седмото издание на фестивалот за современ танц и перформанс – Локомоушн.
Во досегашните шест изданија македонската публика имаше можност да проследи бројни имиња на реномирани автори и компании од Европа, регионот и Македонија, меѓу кои: Мартин Шик, Фуфа Д’Имобилите (Швајцарија), Франческо Скавета (Норвешка/Италија), команијата Во Потрага За Подобар… (Франција) Изабел Шад и Бруно Пошерон (Греманија/Франција), Бара Коленц, Јуриј Коњар, Горан Бодановски, Снежана Премуш и Примож Бежјак (Словенија), Далија Ачин (Србија), Искра Шукарова и Дејан Срхој (Македонија/Словенија), Александра Јанева Имфилд (Хрватска/Белгија), Швајцарската компанија Линга, Мод Лиардон (Швајцарија), Мартин Спамберг, Ингрид Когне, Џон Тајлендер, Ема Ким Хагдал, Маркус Доверуд (Шведска), Вили Прагер (Бугарија) и Соња Преград (Хрватска/Германија) и други.
Студентите од Номад танц академија: Елија Мрак Блумберг (САД), Кире Миладиноски, Кире Ѓорески, Викторија Илиоска (Македонија), Жана Пенчева (Бугарија), Александар Георгиев (Македонија/Бугарија), Селин Ларер и Јана Јевтовиќ (Франција/Канада), Пјер Ив Дијакон (Швајцарија) и други.
Седмото издание на фестивалот ќе понуди нов преглед на најновото и иновативното во полето на современиот танц и перформанс.
Фестивалот ЛокоМоушн оваа година се одвива под многу тешки финансиски услови, кои го ограничуваат пристапот до ресурси, потреби и капацитети на фестивалот. Во вакви околности многу e тешко да се зборува за програмирање на концепт и планирање на фестивалски формат, туку повеќе како за програма и формат кои се во континуирана изградба (under – construction).
-Во такви услови ние единствено сме во можност да обезбедиме одреден простор и да ги поканиме сите учесници, публиката и пријателите и да создадеме рамка за размислување и размена, која ќе овозможи нова соработка и воедување на нови економии на економска размена помеѓу уметниците, културните работници, публиката, споделување на знаење и вмрежување базирано на хетерогени инвестиции, интереси и пракси.Скоро четириесетина гости, уметници, програмски уредници, куратори и патнери кои ќе бидат гости на овогодинешниот фестивал, каде сите заедно ќе се обидеме да гледаме, дискутираме, критички да ги согледаме условите во кои се создава современиот танц денес, се вели во соопштението од организаторите.
LocoMotion #7 се одржува оваа година поради солидарноста на сите уметници, културни работници, куратори и пријатели од Европа, Јапонија, Мексико и САД, вклучени во реализација на фестивалот кои ги донираа своето време, знаење и хонорари за негова реализација.