Никој од Македонија не присуствуваше на Самитот за инвестиции на земјите од Југоисточна Европа што вчера се одржа во Лондон. На Самитот кој го организираше Европската банка за обнова и развој (ЕБРД), присуствуваа премиерите од земјите во регионот, како и министри и бизнисмени.
Премиерот на Македонија не беше меѓу присутните премиери од регионот кои ги претставија потенцијалните инвестиции и го промовираа приливот на странски инвестиции и прекугранични проекти. Нема одговор од Владата и од МНР, дали бил присутен некој од министрите, односно дали меѓу присутните имало некој на пониско ниво.
Но, ниту во извештаите на агенциите, ниту на видео материјалите не може да се види дека некој ја претставил Македонија и странските инвестиции во земјата. Единствено од кабинетот на претседателот на државата одговорија дека од таму немало претставник.
На Самитот премиерот на Србија Александар Вучиќ истакна дека Србија минатата година имала 1, 7 милијарди евра директни странски инвестиции и дека за одржлив систем и требаат најмалку уште две милијарди.
„ Освен ЕУ,најголем трговски партнер на Србија се земјите од регионот и најголем суфицит оставаруваме во регионалната трговија. За нас овие луѓе се многу важни и ние знаеме колку е важно да вложуваме не само во економските, туку и во политичките односи“, изјави Вучиќ.
Хрватскиот премиер Тихомир Орешковиќ го претстави планот за за активирање на т.н мртов капитал во државата, како неколку проекти во областа на енергетиката и инфраструктурата.
„Кога ги гледаме фондовите за инвестиција ги имаме овие 10, 7 милијарди евра кои можеме да ги искористиме и тоа е до нас. Во врска со инвестициите од странство ние треба прво да покажеме дека сме стабилни во однос на даночната политика, ако се менува даночната политика секои шест месеци, тогаш кој ќе инвестира“, изјави Орешковиќ.
Босна и Херцеговина преку својот премиер ги претстави инфраструктурните проекти, а особено понатамошната изградба на Коридорот 5.
„Втор приоритет е Јадранско- јонскиот автопат кој поминува низ БИХ и тоа е вистинска политичка порака за целиот регион, а ќе значи поврзување на БИХ со шест или седум земји од овој регион“, порача вчера на Самитот премиерот на БИХ, Денис Звиздиќ.
ЕБРД меѓу останатото најави дека дека ќе биде покрената регионална платформа за трговија со хартии од вредност на бугарската, хрватската и македонската берза.
.