Владата изминатите четири години се обиде системските слабости во земјоделството да ги прикрие со мерки кои се во спротивност со пазарните услови и бајпасирање на меѓународно прифатените договори, изјави Горан Николовски, член на Извршниот комитет на Либералната партија.
Најавениот состанок на Комитетот на ЦЕФТА покажува колку земјата, според него, е блиску до потенцијална трговска војна.
Како што нагласи на прес-конференцијата Николовски, оваа трговска војна, со Србија поради мерките за ограничување на увозот на пченица, слабиот македонски аграр ќе ја почувствувал преку затворање на традиционалните пазари, особено на штета на традиционалните извозни потенцијали.
„Свесни сме за проблемот со откуп на домашната пченица но нејзината ценовна конкурентност не се брани со интервенционизам. Тука се гледа колку потфрли методот на субвенционирање на оваа Влада”, рече Николовски.
Илустрираше со примерот дека во изминатите седум години владеење на ВМРО-ДПМНЕ, драстично бил зголемен увозот на пченица и брашно. Така, според претставникот на ЛП, во 2006, увозот на пченица изнесувал 25.972 тони, а на брашно 3.513 тони со потрошени вкупно 4,5 милиони евра. Во периодот 2007 до 2012 година, според пресметките на Николовски просечниот увоз на пченица изнесувал 57.318 тони, односно 45.301 тони, а на брашно просечно се потрошени преку 24,5 милиони евра годишно. Само увозот на пченица во 2012-та изнесувал 121.260 тони.
„Ваквите катастрофални резултати се доказ дека Владата и натаму погрешно го третира земјоделство како социјално ориентирана стопанска гранка, наместо како пазарно конкурентна и извозно потенцијална”, тврди Николовски.
Ја повика Владата да информира како ќе влијаат донесените заклучоци на Комитетот на ЦЕФТА по извозните потенцијали на земјоделските производи, особено што се работи за наши традиционални пазари. Исто така, рече дека ЛП бара од Владата да достави до Собранието, анализа на резултатите од врзаниот откуп на пченица и брашно за периодот од 2010 до 2012 година, заедно со информација за влијанието на донесените заклучоци на Комитетот на ЦЕФТА