Луѓето со посебни потреби кои се сместени во институциите ќе го добијат надоместокот за мобилност од 7000 денари назад, откако државата им го укина во мај годинава. Триесетина луѓе од Заводот во Бања Банско кои се со тежок инвалидитет четири месеци нестрпливо очекуваа да поминат измените во Законот за социјална заштита, со кои повторно ќе им биде вратен надоместокот што им беше укинат, а по нивната реакција во некои медиуми министерот Спасов во септември вети дека ќе го добијат назад.
Станува збор за млади луѓе кои се врзани за инвалидските колички, со тежок физички инвалидитет или се слепи, а паричната помош ја добиваа за да можат да излезат надвор од установата, за социјализација и инклузија во надворешниот свет.
-Паричните средства за додатокот ќе можат да ги добијат од денот на стапување на сила на Законот, односно осум дена по излегување во Службен весник велат во Министерството за труд и социјала.
Од таму потенцираат дека корисниците, додатокот за мобилност нема да го добијат ретроактивно, туку од денот на поднесување на барањето, со конзилијарно мислење од тројца лекари-специјалисти и одобрено од првостепена комисија која го утврдува видот и степенот на оштетувањето.
Паричниот додаток беше укинат со образложение дека оваа помош не им следува на луѓето кои се сместени во институции, туку само на тие кои престојуваат во своите домови, а се исто така со тежок инвалидитет.
Собранието денеска на 80-тата. седница ги усвои измените и дополнувањата на Законот за социјална заштита чија цел е подобрување на социјалната заштита на глувите лица преку воведување право на додаток на глувост и воведување на категоријата лица со квадриплегија во остварувањето на постојното право на додаток за мобилност.
Со измените глувите лица ќе добиваат 4.000 денари месечно, а ќе висината ќе се усогласува со порастот на трошоците на живот за претходната година објавени од Државниот завод за статистика, во јануари за тековната година.
Правото на додаток за мобилност се обезбедува и за лицата со квадриплегија над 26-годишна возраст, чиј што вид и степен на попреченост е утврдена со наод, оцена и мислење на надлежен стручен орган. Ова право во номинален месечен износ ќе биде 7.000 денари, усогласен со порастот на трошоците на живот за претходната година објавени од Државниот завод за статистика, во јануари за тековната година.
Со предложените измени и дополнувања се предвидува и остварување на право на парична помош од страна на самохран родител кој што ќе се грижи за своето дете кое има пречки во развојот во континуитет од 15 години, без тоа да биде сместено во установа за социјална заштита, кој е невработен и не користи право на пензија, по навршени 62 години на живот за жена, односно 64 години на живот за маж.
Висината на паричниот надоместок ќе изнесува 8.000 денари, усогласена со порастот на трошоците на живот за претходната година.
Со измените се врши и зголемување на висината на социјалната парична помош и постојаната парична помош за 5 проценти.