„Има мир, слобода, транспарентност, многу придобивки од промената на режимското време. Слободата скапо ја плативме и не смееме да ја изгубиме“ рече директорката на УЈП и заменик-претседателка на СДСМ, Сања Лукаревска во „Само интервју“ на Канал 5.
Таа додаде дека се подготвува Законот за ветинг, за да се промени перцепцијата и недовербата на граѓаните кон судството и обвинителството.
„Мора да ја промениме перцепцијата во тој дел, но сепак далеку сме од приказната дека некоја партија може да биде судски совет, како што беше на времето или дека некој партиски поединец може да биде судија за одредени спорови. Ние се боревме против тоа и го променивме“ рече Лукаревска.
Заменик-претседателката на СДСМ истакна дека се подготвува и Законот за проверка на имот со кој ќе може да се конфискува нелегално стекнат имот и да се прави проверка на имотот на сите избрани и именувани функционери.