Семејството на писателот Славко Јаневски денеска излезе со реакција дадена за НОВА, на одлуката на Комисијата за лустрација:
“Реагираме пред се, поради тоа што оваа одлука е донесена постхумно, односно без право на лично мислење и право на одбрана на Јаневски.
Со оглед на тоа дека актуелниот наслов на Законот за лустрација се однесува на вршење на јавни функции во моментов или во иднина, затоа што идејата е да се спречи вршење на функција со која би се кршеле човековите права, одлуката на Комисијата да биде лустриран поранешен носител на јавна функција станува апсурдна.
Славко Јаневски е автор на првиот роман напишан на македонски јазик, еден од основачите на Друштвото на писателите на Македонија, еден од основачите на МАНУ, директор и уредник на Издавачката куќа “Македонска книга”.
Семејството го опишува Славко Јаневски како човек кој секогаш сакал да помогне, на што е засновано и целото негово литературно творештво и сигурно не би го погазил со вакви активности за кои е обвинет. И конечно, не му е дадено основното цивилизациско право да се одбрани од ваков тип на клевета.
Ве потсетуваме на стиховите на писателот Славко Јаневски, со кои како да го предвидел и линчот врз себе после 13 години од смртта.
Јас не знам дали сум добар Македонец,
Арен Македонец,
Што изел Македонец,
Та не знае дали 1+1 е Македонец
Или 2-1 е Македонец.”, се вели во реакцијата на семејството на великанот на македонската книжевност Јаневски.
Oваа реакција доаѓа по информациите за лустрација која се однесува на поранешен академик и писател.
Иако лустраторите не го кажуваат неговото име, сепак, според назнаките кои се дадени станува збор за академик и писател познат по делото „Селото зад седумте јасени“ чие досие го носи името „Славјан“.
Покрај него лустрирани се уште 15 лица. Еден од оваа група лустрирани е починат.
Членот на лустрациската Комисија Чедо Дамјановски за НОВА изјави дека ваквите потези се спротивни на одлукатa на Уставниот суд- поранешни, починати функционери да се лустрираат, додавајќи дека вчера Советот на Европа ги критикуваше македонските власти затоа што не се почитува одлуката на Уставниот суд.