Венецуелскиот претседател Николас Мадуро нареди воено заземање на синџирите- продавници за техничка опрема „Дака”- тоа е пресметка со високите цени кои се пречка за националната економија.
Властите уапсиле неколку менаџери на компанијата „Дака” која во пет продавници вработува 500 лица и им наредила своите производи од саботата да ги продаваат по пониски цени. Поради тоа во продавниците се создадоа вистински стампеда од купувачи.
„Го правиме тоа за доброто на народот”, изјавил претседателот на Венецуела кој богатите деловни луѓе и десничарски опозициски политичари кои ја имаат поддршка од САД ги обвинува дека водата економска војна против неговата земја.
-Наредив заземање на продавниците на таа трговска мрежа да на народот да му ги понудиме своите производи по чесни цени. Купете сѐ, ништо нека не остане во магацините. Следните денови ќе ја прочешламе целата држава. Ова ограбување на народот мора да престане.
Мадуро потврдил дека раководството на компанијата е притворено, а цените по кои стоките се продавале, во некои случаи за 1.000 отсто ја надминувале набавната.
Според локалните медиуми, согласно домашните прописи, маржата не може да биде повисока од 30 отсто, без соодветно образложение и одобрение.
Во саботата, според медиумите, во продавниците на синџирот „Дака” од рано утрото почнале редиците луѓе, а во некои случаи дошло и до немири.
Во сојузната држава Карабобо, толпата ги скршила излозите и ограбила една продавница во Валенсија во централниот дел од земјата, а слики од настанот се дистрибуирани преку социјалните мрежи. Затоа војниците ги заемале влезовите и организирале редови пред главната продавница на „Дака” во престолнината Каракас.
Според официјалната интернет страница на „Дака”, таа е најголемата мрежа за продажба на мало на електрични стоки во Венецуела, која има повеќе од 2.500 вработени.
Инспекторите во саботата ги преплавиле продавниците во Каракас вршејќи проверки на цените, во рамките на владината кампања против трговците кои се обвинети како шпекуланти.
Мерката на Мадуро следуваше по повеќенеделните апели до сопствениците на продавниците пред католички Божик да ги намалат цените, а тоа според западните критичари потсетува на театралните потези на неговиот претходник починатиот претседател Хуго Чавез кој владееше со Венецуела 14 години.