Филмот „Мајки“ на Милчо Манчевски следната недела ќе биде прикажан во Линколн Центарот во Њујорк. Се работи за домот на Њујоршкиот филмски фестивал и на Метрополитен операта.
„Мајки“ својата светска премиера ја доживеа на фестивалот во Торонто, а европската во престижната програма „Панорама” на Берлинале. Филмот, добитник на седум меѓународни награди, беше и македонски кандидат за Оскар.
Европската филмска академија го вброи „Мајки” меѓу 40-те најдобри филмови во Европа.
Филмот беше претставен и пред публиката на 40-тина фестивали, меѓу кои и: Сао Пауло (Бразил), Истанбул (Турција), Корк (Ирска), Мадеира (Португалија), Минск (Белорусија), Мадрид (Шпанија), Сиракјуз Њујорк (САД), Утрехт (Холандија) и други.
Главните улоги ги толкуваат Ана Стојановска, Ратка Радмановиќ, Салаетин Билал, Владимир Јачев, Диме Илиев, Димитар Ѓоргиевски, Марина Поп-панкова, Горан Трифуновски.