Неизвесна е судбината на 1500 бегалци кои останаа заглавени во транзитниот центар во Табановце и во меѓузоната. Откако се затвори „балканската рута“, веќе трет ден не се знае што ќе биде со овие луѓе кои на студеното време и дождот чекаат да го продолжат својот пат.
Македонија очигледно нема стратегија што ќе прави со 437 бегалци кои се наоѓаат на отворено, на нива во меѓузоната и 1050 бегалци во транзитниот центар во Табановце. На синоќешниот состанок Управувачкиот комитет не донел никакви конкретни решенија што ќе биде со судбината на овие бегалци, откако Србија ја затвори границата, исто како што тоа го направи и Хрватска, бидејќи Словенија започна да го применува новиот режим за влез на бегалците во Шенген зоната.
Во Центарот за Управување со кризи велат дека ништо не зависи од Македонија и дека останува да се договорат земјите што ќе се превзема понатаму. Владиниот портпарол денеска изјави дека границата на Македонија не е затворена и дека државата е условена од одлуките на другите земји.
„Македонија не ги затвори границите, се работи согласно координатите на останатите земји, односно колку мигранти ќе излезат од Македонија толку ќе бидат и примени на јужната граница. “, одговори на прашањето на НОВА владиниот портпарол Александар Георгиевски.
Во меѓувреме состојбата на Табановце е критична. Во меѓузоната, на сред нива се наоѓаат 437 бегалци, повеќето жени и деца на кои им е потребна лекарска помош. Тие се заглавени во меѓузоната, не можат да влезат ниту во Србија, ниту во Македонија.
„Не постои шатор од кој не се слуша детско кашлање“ велат од УНХЦР.
Договорот меѓу ЕУ и Турција кој беше постигнат на 7-ми март, за враќање на бегалците во Турција треба да се официјализира и прецизира на Самитот на 17 и 18 март. За тоа време нивната голгота продолжува. Дождот и студеното време, не им се сојузници, тие станаа жртви во оваа хуманитарна катастрофа. Во моментот во Македонија се заглавени 1500 бегалци, во Србија 1000, во Хрватска околу 400 бегалци.
Од завчера границата со Грција е целосно затворена за прием на нови бегалци кои чекаат кај Идомени. Србија исто така веќе не пропушта бегалци од Македонија.
Транзитниот центар „Винојуг“ кај Гевгелија е празен. Бегалците кои пред три дена тргнаа кон север беа последната тура што замина од центарот.
Најкритично е во кампот во Идомени во кој има 13 до 14 .000 бегалци. Кампот буквално плива во вода, секаде има кал и фекалии, постои опасност од жолтица и други заразни болести. Неколку групи Иранци и Авганистанци неможејќи да ги издржат условите вчера со автобуси се вратија во Атина. Бегалците од Сирија одбиваат да се вратат назад, во надеж дека ќе добијат можност да го продолжат патот кон некоја од земјите на ЕУ.