Македонија е меѓу партнерите на САД од европскиот регион за кои се предвидени 713 милиони долари на воена помош што ќе бидат употребени за сузбивање на руското влијание, се посочува во одговорот на Стејт департментот на прашање на „Гласот на Америка“ за дообјаснување на структурата на пакетот.
Според информациите од таму, средствата од најновиот пакет на воена помош на САД за Украина ќе бидат поделени на „Украина и 15 други сојузнички и партнерски нации“ во Источна Европа и на Балканот.
„Помошта е наменета за НАТО сојузниците да ги пополнат капацитетите што ги донираа на Украина од сопствените залихи за да го задржат и засилат одвраќањето на Алијансата. Повеќе од 322 милиони долари од тие средства се пријавени за Украина и дополнително ќе ја подобрат нејзината способност за одбрана во војната со Русија која е во тек“, се вели во дел од одговорот на Стејт департментот.
Инвестицијата од 322 милиони долари во Украина, како што се наведува, ќе овозможи широк опсег на способност, вклучувајќи и за НАТО нестандардни системи на оружје, ќе помогне на украинските сили да преминат на системи на НАТО за истрели со голем домет, како што е артилерија и ќе ја поддржат способноста на противвоздушната одбрана.
Грузија, исто така, ќе добие 35 милиони долари за финансирање на комплети на борбена опрема за бригади, за напредни артилериски тактички систем на податоци, способност за мобилност и сајбер одбрана.
„Останатиот дел од пакетот од 713 милиони долари ќе обезбеди одбранбени артикли, обука и услуги за Македонија, Албанија, Бугарија, Хрватска, Естонија, Летонија, Литванија, Молдавија, Црна Гора, Романија и Словенија; потоа ќе се поддржи Иницијативата за развој на напредно таргетирање за Бугарија, Чешка, Естонија, Литванија, Летонија и Словачка и ќе овозможи дополнителна поддршка за БиХ во рамки на Фондот за сузбивање на руско влијание“, се вели во одговорот на Стејт департментот.