Двата историски Илиндена – 110 години од Илинденското востание и 69 години од Првото заседание на АСНОМ денеска се одбележуваат со големи народни собири на Мечкин Камен во Крушево и во Меморијалниот центар АСНОМ во кумановското село Пелинце.
На централното чествување во Крушево ќе присуствува и ќе се обрати претседателот на Владата, Никола Груевски, кој е покровител на годинашната манифестација „Десет дена Крушевска Република“.
Делегацијата ќе положи цвеќе на гробот на Никола Карев, на споменикот на хероите на местото Слива и на споменикот на бранителите на Крушевската Република на Мечкин Камен, каде што ќе се одржи големиот народен собир.
Настапот има ансамблот за фолклор „Танец“, а вечер на плоштадот „Никола Мартиновски“ во Крушево настапува Културно-уметничкото друштво „Наум Наумовски-Борче“.
На чествувањето во Крушево, традиционално, ќе учествуваат и коњаниците на традиционалниот Илинденски марш кои на 27 овој месец тргнаа од скопско Горно Лисиче кон Крушево.
Манифестацијата „Десет дена Крушевска Република“ трае до 10 август и ќе биде заокружена на Гумење, со церемонија на спуштање на бајракот и стрелба за хероите на Илинден и Крушевската Република.
Во Меморијалниот центар АСНОМ во кумановско Пелинце, каде што исто така ќе се одржи народен собир, ќе присуствува претседателот на Република Македонија, Ѓорге Иванов.
Во Скопје, претседателот на Собранието Трајко Вељаноски ќе положи цвеќе и ќе има обраќање пред споменикот на Методија Андонов-Ченто, претседателот на Президиумот на АСНОМ. Цвеќе ќе биде положено и пред спомениците на Никола Карев и на АСНОМ.
Лидерот на СДСМ Зоран Заев и генералниот секретар Оливер Спасовски ќе бидат на прославата во Пелинце, додека своја делегација СДСМ ќе ја претставува во Крушево.
Традиционално, во битолското село Трново се одржува 42 Светска македонска средба во организација на Матицата на иселениците, Светскиот македонски конгрес и Сојузот на Македонците од Егејот „Македон“.
Во манастирот Прохор Пчињски и оваа година нема да присуствува македонска делегација. Владата не ни побарала од српската православна црква да дозволи одбележување на празникот, заради негативните одговори што редовно ги добиваше изминатите години, јавува Радио Слободна Европа.
Иако минатата есен македонската Влада и дозволи на Србија со највисоки почести да ја прослави годишнината од битката кај Зебрњак, од српската православна црква не сакаат да
ги отворат вратите од манастирот за официјални гости од Македонија.
Српскиот претседател Томислав Николиќ тогаш се заложи дека ќе посредува за решавање на спорот меѓу двете цркви, но односите се останати статус кво.