Македонија е на 112 место со оценка 68 на листата на „The Failed States Index 2013 “ „Индекс на пропаднати држави 2013“ – во светот која ја прави Фондот за мир.
Oваа година на листата се рангирани 178 држави, а се прави според повеќе индикатори, меѓу кои социјална политика, право, инфраструктура, економски слободи, безбедност.
Оваа година Македонија се искачи за три позиции во однос на лани и е во групата на држави кои се најдоа меѓу „предупредувачка“ и „стабилна“ состојба или „благо предупредувачка“.
Во групата се Албанија која е на 119 позиција, Украина, Кипар, Брунеи, Боцвана.
Од регионот полошо рангирани од Македонија се само Србија која се најде на 92 место и Босна и Херцеговина кои се во категоријата „ во опасност“.
На подобри позиции се Бугарија која е на 132 место, Црна Гора која се најде на 134 место, Хрватска 135 и Грција која е на 138 позиција.
Словенија е меѓу стабилните држава во регионот.
Анализата на прво место како најнестабилна држава ја рангира Сомалија која е на првата позиција, Конго на 2 и Судан кој се најде на 3 позиција. Меѓу 20 најлошо рангирани се 15 држави од африканскиот континент.
Како и што се очекуваше најуспешни држави се Финска која е на 178 позиција со 18 бодови, потоа Шведска која е на 177 позиција, а ги следат Норвешка, Швајцарија, Данска. Од 20 најдобро уредени држави, 16 се европски, со што Европа е најстабилниот континент.
Оценувањето на државите е според 12 индикатори за кои се даваат оценки од еден до 10, при што еден е најдобар, а 10 е најлош резултат.
Се однесуваат на состојбата на државата во поглед на сиромаштвото на луѓето, нивните права, задоволството на граѓаните, економскиот развој, легитимноста и безбедноста на државите.