Македонија е дел од дваесетте држави, кои покрај САД, даваат поддршка на желбата на кубанскиот народ за слобода, откри во писмена изјава американскиот државен секретар Ентони Блинкен.
-Демократиите ширум светот се обединуваат за да го поддржат кубанскиот народ, повикувајќи ја кубанската влада да ги почитува барањата на Кубанците за почитување на универзалните човекови права. Како што рече претседателот Бајден, кубанскиот народ упати „јасен повик за слобода“. Кубанската влада не одговори со препознавање на гласот на сопствениот народ, туку со понатамошно задушување на тие повици преку произволно одредување притвори и тајни судења за кои нема соодветни гаранции, вели Блинкен.
Според него, САД ќе продолжат да ја поддржуваат желбата на кубанскиот народ за слобода, додавајќи дека е објавена и заедничка изјава зад која стојат: Австрија, Бразил, Колумбија, Хрватска, Кипар, Чешка, Еквадор, Естонија, Гватемала, Грција, Хондурас, Израел, Летонија, Литванија, Косово, Црна Гора, Северна Македонија, Полска, Република Кореја и Украина.
-Ја повикуваме кубанската влада да ги почитува законски загарантираните права и слободи на кубанскиот народ без страв од апсење и притвор. Ја повикуваме кубанската влада да ги ослободи приведените заради остварување на нивните права на мирен протест. Ние повикуваме на слобода на печатот и на целосен пристап до Интернет, што им овозможува на економиите и општествата да напредуваат. Ја повикуваме кубанската влада да ги послуша гласовите и барањата на кубанскиот народ, пишува во заедничката изјава на дваесетте Влади.
-Соединетите држави и меѓународната заедница ќе продолжат да даваат поддршка на кубанскиот народ додека се обидуваат да ги практикуваат оние универзални човекови права и слободи на кои сите поединци имаат право, заклучи Блинкен.