Нема одговор од Министерството за земјоделство дали ќе ја повлече одлуката со која се ограничува увозот на пченица и брашно. Нема никаква потврда дали Србија започна да го отежнува увозот на македонските производи за време на викендот како што најавија српските медиуми во петокот.
-Нема најава за такво нешто, се следи состојбата на пазарот беше одговорот што НОВА успеа да го добие од Службата за односи со јавноста во ресорното Министерство денеска.
По ова побаравме објаснување што значи тоа дека се следи домашниот пазар, на кој начин и со која се следи состојбата.
Одговорот кој следуваше подоцна го добивме преку сооштение кое беше испратено до сите медиуми.
Во него се вели дека досега се откупени 82 проценти од пченицата или 120 000 тони од планирана количина на домашна пченица, која се движи во границите на откуп од претходните жетви. Во ресорното Министерство велат дека будно ги следат активностите со откупот на домашната пченица и се обидуваат да ја забрзаат динамиката на откупот.
-Секојднево сме во комуникација со сите фактори вклучени во процесот на откупот, со производителите на пченица и мелничко пекарскиот сектор, преку кои се следи количината на откупена пченица и состојбите на теренот. Тимови од Државниот инспекторат за земјоделство секодневно доставуваат теренски податоци за откупот на домашната пченица се вели во соопштението.
Министертвото апелира сите инволвирани страни да се фокусираат да се забрза откупот на пченицата што сеуште не е откупена, за да се заштитат на интересите на индивидуалните земјоделски производители на пченица, како и интересите на домашните компании од мелничко-пекарскиот сектор и стабилизирање на домашниот пазар со пченица и брашно.
Токму оствaрувањето на овие цели е приоритет кој е во интерес на Македонија и македонското земјодество се вели на крајот од ова соопштение.
И додека Министерството за земјоделство калкулира и математички се обидува да најде формула со која ќе дојде до замислената цел, српската страна станува нестрплива и бара министерот Љупчо Димовски да го одржи ветувањето дадено на 10 јули, кога со српскиот потпретседател на владата Расим Љајиќ се договориле одлуката да биде укината.
Љајиќ изрази очекување дека нема да има потреба од воведување на контра мерки и дека Македонија ќе ја повлече одлуката со која се ограничува увозот на пченицата.
-Цефта од Македонија бара да ја повлече одлуката со која се крши спогодбата за слободна трговија и јас искрено се надевам дека тоа ќе се случи во најскоро време изјави Љајиќ (16.082013) во интервју за Нови Магазин.
Инаку, проблемот настана кога Мaкедонија одлучи увозот на брашно и пченица да го поврзе со купување на домашно брашно и пченица, односно за килограм пченица од увоз од сите земји, па и од Србија македонските увозници мора да купат три килограми домашна пченица, а за увоз на килограм брашно, четири килограми брашно од домашно производство.