Македонија најверојатно годинава повторно ќе биде рекордер по умрени новороденчиња во Европа. Само до септември, бројот на починати новороденчиња се изедначил со минатогодишниот кога Maкедонија се најде на прво место на табелата на Еуростат, како земја со најголема стапка на смртност кај бебињата во Европа, дознава НОВА од Комитетот за безбедно мајчинство.
Фрапантните податоци до кои дојде НОВА говорат дека во првите девет месеци од годината починале 212 новороденчиња, исто колку и целата мината година. Со ова Македонија чекори кон врвот од топ листата како земја каде најмногу умираат новородени бебиња.
-Податоците се поразителни и дури се полоши од минатата година изјави за НОВА доктор Душко Филиповски претседател на Здружението на приватни гинеколози на Македонија и член на Комитетот за безбедно мајчинство.
Причина за ваквата состојба гинеколозите ја гледаат во лошата здравствена политика, недостигот од гинеколози во државата и немањето на финансиски средства за да се реализираат програмите наменети за жените во текот на бременоста.
Ова особено ги погодува социјално ранливите категории на жени без разлика на која етичката заедница припаѓаат. Тие немаат пари да плаќаат партиципација или да патуваат до најблискиот центар доколку во нивното место на живеење нема гинеколог. Од тие причини Националниот ромски центар се залага да се укине партиципацијата за гинеколошките прегледи во текот на бременоста, не само за оваа категорија туку за сите жени, со што очекуваат да се намали и смртноста кај новороденчињата.
Во Македонија годишно се раѓаат околу 22 000 деца, а 1 процент од нив умираат во првата недела по раѓањето, што е катастрофално за една средно развиена земја велат експертите. Бесплатните гинеколошки прегледи за бремните жени државата ќе ја чинат 50 000 евра годишно.