Премиерот Никола Груевски утре во Брисел ќе учествува на средбата на премиерите од шест балкански земји и комесарите за проширување и транспорт Јоханес Хан и словенечката комесарка Виолета Булц.
Засега не е познато дали премиерот ќе има и други средби посветени на политичката криза во земјата а се очекува дека во текот на неделата во Европскиот парламент (ЕП) ќе се одржи третата рунда преговори помеѓу ВМРО-ДПМНЕ и СДСМ со европската парламенатарна тројка на олеснувачи – Едвард Кукан, Иво Вајлг и Ричард Ховит.
Во текот на оваа недела се одржува и состанок на министрите за надворешни работи во Луксембург на кој ќе се усвои заклучок за Македонија. Во него македонските политички партии ќе бидат повикани за најдат решение за политичката криза но исто така ќе се спомене и содржината на разговорите што ги објавува СДСМ и барање да се обрне внимание на овој аспект од кризата.
Истовремено европските министри ќе се обврзат дека ќе се навратат на оваа тема многу скоро и ќе изразат сериозна загриженост од настаните во Македонија.
Утрешниот состанок со премиерите од Балканот ќе биде продолжување на министерската средба во Приштина на која се разговарало за клучните транспортни мрежи во нашиот регион. Овој бриселски состанок, вели Европската комисија, треба да даде потврда на веќе договореното во Приштина преку заедничка декларација и на него треба да се разговара за конкретните чекори кои би требало да помогнат да се применат транспортните мрежи на Балканот.
Kомесарите треба да се сретнат и билатерално со балканските премиери на Албанија, Босна и Херцеговина и Србија но засега, во агедната на Хан, не е предвидена средба со македонскиот премиер.