На маршот во должина од 11,5 километри учествувале членови на планинарските друштва „Лисец” од Штип, „Бел Камен” од Радовиш и „Бела Екстреме” од Петрич, Р. Бугарија, пренесуваат локалните медиуми.
– Сите горенаведени планинари направивме една рекреативна дружба за искачување на врв Борова Могила на 1219 метри надморска висина, што беше во организација на ДПС „Лисец” Штип, додека ние бевме нивни водичи, бидејќи се работи за терен кој е многу познат за нас како клуб. Маршутата започна од манастирот Св.Илија над делчевското село Ѕвегор на 800 метри надморска висина со движење во правец кон Илин Камен, Чутурски Рид се до врвот Борова Могила, истакнал лиценцираниот планинарски водич Љупчо Чучуковски.
Маршот се одвивал по сончево време со позитивни температури, без ветар и доста голема видливост.
– На поедини места имаше сосема малку снег, но генерално временските прилики беа одлични. На крај завршивме во Вила Делчо Транс на 1139 метри надморска висина, со позитивна дружба исполнета со жива музика од планинарите кои свиреа на инструменти, изјавил Чучуковски раскажувајќи за временските услови под кои се одвивал маршот. Тој најавил нови алпинистички подвизи за во иднина.