Ние Македонците во Холандија, повеќето љубовни емигранти, но и по некој студент, инжињер, работник и хулиган, повикуваме на протест против корумпираното и криминално здружение кои со години веќе ја гушат слободата, правдата и еднаквоста во Македонија.
Загрижени за политичките случувања во Македонија, огорчени од самоволието на режимот, но и охрабрени од масовната мобилизација на илјадници граѓани кои ја започнаа Шарената Револуција, ние даваме целосна поддршка на отпорот и на сите барања на граѓанското движење #Протестирам: – Итно повлекување на одлуката за аболиција на сите оние против кои се води истрага и против кои е покренато обвинение од страна на Специјалното јавно обвинителство (СЈО); – Итна и неотповиклива оставка на Ѓорге Иванов од функцијата Претседател на Република Македонија; – Произнесување на Уставниот суд за уставноста на СЈО; – Формирање на специјално одделение на Кривичниот суд, кое ќе биде надлежно за случаите под јурисдикција на СЈО; – Итно повлекување на одлуката за одржување на парламентарни избори на 5 јуни; – Задолжително вклучување и присуство на независни претставници на граѓанското општество во процесот на решавање на кризата; – Формирање на преодна влада која докрај ќе ги имплементира итните реформски приоритети од извештајот на Прибе.
Да излеземе ние Македонците, но и сите пријатели на Македонија во Холандија и да ја поддржиме Шарената револуција, зашто таа е праведна, мултиетничка, непоткупена, таа не е сива ниту барокна, таа е отпор и непокор. Ќе не биде, и во тоа име, ќе правиме се што можеме.