„Појавувањето на премиерот е показна вежба од страна на Груевски кој е главен во оваа држава и тој ја носи најголемата одговорност за сето она што се случува во овој момент. Автор на политичката криза во Македонија е токму Никола Груевски“, изјави денеска Јани Макрадули од СДСМ критикувајќи го постојаното присуство на премиерот на промоциите на кандидатите за локалните избори.
Според Макрадули постојат теоретски можности за договор околу изборите.
„Се додека не се одржат изборите политичкиот договор е можен. Видовме дека ВМРО-ДПМНЕ и ДУИ кога сакаа со пописот да создадат „Македонија од 7 милиони жители“, го прекинаа и фрлија во ветер 10 милиони евра, пари на граѓаните на Република Македонија. Ако се сака може да се постигне договор“, изјави Макрадули.
Тој пред новинарите изрази жалење затоа што се уште нема повратна информација од Јавното обвинителство за поднесените кривични пријави после 24ти декември.
„Гледаме дека господинот Трајко Вељаноски ужива уште во својата функција и благодети, и продолжува да го крши Уставот и Законите со работата во Собранието. Измените на Деловникот се типичен пример за тоа“, вели Макрадули.