Францускиот претседател Емануел Макрон тргнува во битка со екстремната десница во Европскиот парламент (ЕП). Тој и шефот на европските либерали Ги Верхофштад, поранешен белгиски премиер, најавија ново движење на либерали и центристи со кое ќе се претстават на европските избори закажани за мај 2019 година, изјави Белгиецот за француски и белгиски медиуми.
Според него, тие влегуваат во битка против националистите и популистите:
– По средбата на Орбан и Салвини, борбата за 2019 година ќе се одвива помеѓу популистите и националистите од една страна и про-европската алтернатива, рече тој за белгиското национално радио.
Унгарскиот премиер Виктор Орбан и италијанскиот министер за внатрешни работи Матео Салвини се сретнаа на крајот на август во Милано и изјавија дека “заедно ќе одат по истиот пат” со креирање на анти-мигрантски фронт кој, според нив, ќе им се спротивстави политиките на Макрон и со кој сакаат да ја сменат и политиката на Европската комисија (ЕК) со тоа што би победиле на европските избори а тоа би им дозволило да именуваат претседател на оваа институција.
Макрон, Верхофштад но и канцеларката Меркел како и премиерите на Луксембург, Холандија – Ксавие Бетел и Марк Руте – се загрижени поради порастот на екстремистите во повеќе земји во ЕУ. Макрон се сретна со Меркел, Бетел и Руте.
Поранешниот белгиски премиер тврди дека тој и Макрон ја “ја делат истата анализа” и дека имаат “повеќе или помалку исти предлози” за иднината на ЕУ. Со ова движење, чие има ќе биде објавено во октомври, тие ќе формираат политичка група во ЕП.
– Тоа ќе биде нешто ново. Ќе биде движење, про-европска алтернатива против националистите, изјави Верхофстад. И додаде дека тоа движење ќе треба да има тежина во ЕП и да биде алатка за сопирање на националистичкиот и популистички бран кој сака да ја освои ЕУ.
Особено загрижувачки се насилните манифестации од последните денови во германскиот град Шемниц:
– Не мислам дека повеќе луѓе ќе гласаат за националистите и популистите, но тие движења стануваат се поагресивни и отворено кажуваат дека сакаат да ја уништат европската градба и ЕУ со употреба на проблемот со миграцијата, анализира Белгиецот.
Европскиот систем на одлучување датира од 19 век
Според заедничката анализа помеѓу него и Макрон, потребен е проект во кој ќе се стави крај на системот во кој, кога има проблем, треба да се добие согласноста на сите 28 земји членки во ЕУ. Според него, тоа не функционира и секогаш кога ќе се појави проблем, со потрагата по едногласност се губи скапоцено време и решението доаѓа предоцна:
– Видовме дека тоа не функционира. Секогаш доаѓаме предоцна и нашите мерки се слаби затоа што нашиот систем на одлучување во институциите не е адаптиран на денешниот свет кој се движи многу брзо, вели тој и додава дека европските системи на одлучување датираат од 19 век и од тие причини мерките на ЕУ за, на пример, миграцијата, доаѓаат предоцна и им дозволуваат на популистите да го завземат политичкиот терен.
Тој ја дава како пример на овој феномен миграцијата и ЕУ правилото според кое ЕУ земјата во која пристигнува еден мигрант е таа што треба да се грижи за него па со тоа сите проблеми со мигрантите паднаа врз грбот на Италија, Грција и Шпанија. А во тој процес најголемиот број ЕУ партнер не покажаат ни трошка солидарност и го оставија товарот врз овие земји.
Верхофштад вели дека Макрон сака од европската демократија да направи транснационална и пан-европска демократија:
-Тоа ни е потребно и таму треба да се наоѓа власта а не само на масата на 27 или 28 ЕУ лидери. Европската демократија е во опасност и тоа е главниот предизвик на следните европски избори, вели тој.
Макрон формираше свое движење со кое ја освои власта во Франција и сака со слична стратегија да настапи на ЕУ изборите во 2019 година.