– Срамота е да се тврди дека Шиповиќ е во бегство, кога и советниците од ДПМНЕ од Центар знаат дека тој е повеќе од три недели во странство поради здравствени причини на член на неговото најтесно семејство, изјави на денешната прес-конференција, потпретседателот на СДСМ, Дамјан Манчевски.
Според него, се работи за хајка која МВР ја започна против претседателот на Советот на општина Центар, и дека таа хајка претставува одмаздничка и политичка, а не правна акција.
Манчевски потенцираше сомневање дека ова е уште еден обид на власта да ја блокира општината Центар.
„Откако не ја заштити општината и советниците од платените демонстранти кои фрлаа со камења, МВР и денес продолжува да води политика и да ја крши уставната и законската гаранција за пресумпција на невиност со голема и веќе видена медиумска злоупотреба“, обвинува Манечвски.
Воедно, во разговор со НОВА, Мирослав Шиповиќ обелодени дека никогаш не крадел ниту лажел, и дека во САД е поради операцијата на неговиот син. Тој потенцираше дека се враќа на 15 октомври и очекува да биде уапсен.
Шиповиќ се сомнева дека ова е уште еден обид на власта да ја опструира работата на општина Центар, и дека се работи за обид да се прегрупира Советот.