Вооружени исламистички борци во североисточна Нигерија нападнале студентски дом во колеџ за земјоделство и запалиле повеќе простории. Се претпоставува дека се работи за убиени најмалку 50 студенти, јавува ББЦ.
Според полицијата, бројот на жртвите може значително да се зголеми.
-Досега регистриравме 28 жртви, изјави соработник на болницата во Даматуру, но воен портпарол пак изјави дека се работи за над 40 убиени.
Терористите упаднале во зградата и почнале да ги убиваат еден по еден студентите, кои во тоа време спиеле. Колеџот е под контрола на полицијата.
Досега никој не ја презеде одговорноста за нападот. Во минатите месеци исламистичката терористичка група Боко Харам изврши повеќе атентати врз училишта во регионот. Оваа милиција од 2008 година со терористички методи се бори за воведување на шеријатското право во северна Нигерија. Како што самата наведува, таа е блиска до терористичката организација Ал Каеда.
Во мај владата на претседателот Гудлак Џонатан воведе вонредна состојба во североисточна Нигерија. Оттогаш, војската засилено се пресметува со припадниците на Боко Харам, кои пак го зголемија бројот на нападите врз цивилното население. Во многу села и места се формирани групи за самоодбрана.
Вестите од областа се обоени со пропаганда од двете страни и тешко проверливи. Во областа тешко можат да продрат независни набљудувачи.