Матичните лекари во петок ќе имаат три часовен протест со тоа што на пациентите нема да им издаваат електронски упати. Прегледи,креирање на рецепти и се друго ќе се одвива нормално. Вака одлучило Собранието на Здружението на приватните лекари, откако истече рокот од три недели кои им го дадоа на надлежните за да ги повикаат на разговор за нивните барања.
Лекарите бараат фиксни плати од 40.000 илјади денари за лекар и 20.000 денари за медицинска сестра, зголемување на надоместокот(капитацијата) по пациент, како и воведување на партиципација, и решавање на суштинските проблеми со префрлањето на пациентите кога еден од двајцата лекари ќе ја напушти ординацијата.
„ Во петок на 26.09.2014 година во период од 09-12часот, нема да креираме електронски упати на „МОЈ ТЕРМИН“ сите матични доктори кои ги прифатија проектите на оваа Влада“, стои во одлуката која ја донеле лекарите.
Претседателот на Здружението на приватни лекари, Лилјана Чолакова Дервишова за НОВА изјави дека оваа одлука Собранието ја донело откако никој од надлежните не ги повикал на разговор.
„Помина рокот што им ги дадовме на надлежните во здравството. Сметаме дека проблемите можат да се решат само со дијалог на заедничка маса. Бидејќи тоа не се случи, сметаме дека ова е единствен начин за да го свртиме вниманието кон нашите проблеми“, изјави за НОВА Дервишова Чолакова.
Таа вели дека три недели се доволен период , за да се разговара,преговара и да се донесе некаков заклучок.
Од Здружениието велат дека лекарите ги исполниле сите обврски наметнати со реформите, набавиле квалитетни компјутери со лиценци, принтери,тонери, поделиле електронски читачи низ цела Македонија,пополниле обрасци за пензионери за електронски картици. Покај ова, лекарите велат дека ги зголемиле платите на вработените за 0,5 посто, исплаќаат К-15, се осигурале од професионална грешка .
Од таму потенцираат дека доколку не се решат проблемите доведен е во прашање опстанокот на 3.000 приватни ординации поради финасиски и законски оптoварувања.