Филип Медарски, адвокатот на новинарот на Нова Македонија Томислав Кежаровски, денеска поднесе предлог за укинување на мерката притвор, отфрлајќи ги како неосновани причините за ваков вид на драстична мерка, а во исто време повикувајќи се на слободата на изразување.
Медарски вели дека согласно праксата на судот во Стразбур, во секој одреден случај судот треба да даде конкретни причини врзани за одредена личност, а не да оди со цитирање на законската одредба или да зборува за висината на пропишаната казна.
Според него, обинителството не дало конкретни причини уште во одредувањето на мерката притвор и заради тоа притворот во конкретниот случај не е оправдан.
На 28 мај полицијата на насилен начин и пред семејството го приведе Кежаровски, под сомнение дека оддал информации за сведок, за кој тврди дека бил заштитен, со што го прекршил Законот за заштита на сведоци.
Од друга страна, Главниот и одговорен уредник на Нова Македонија Зоран Димитровски за НОВА изјави дека е скандалозен притворот на Кежаровски, кој всушност открил дека се работи за лажен сведок.
Исто така, Кежаровски по сообраќајката во која загина сопственикот и новинарот во Фокус Никола Младенов, во весникот Нова Македонија, каде што работеше, објави материјал за коj тврдеше дека се докази, поточно ливчиња од патарини за којшто се претпоставува дека биле на Младенов, а биле оставени на местото каде што се случи трагедијата, по увидот на истражните органи.