Хрватскиот претседател Зоран Милановиќ денеска без влакна на јазикот го оцени наводниот документ за промена на границите на Балканот, изразувајќи надеж дека тој не потекнува од Словенија, објави денивник.хр.
Последните денови, јавноста во регионот се занимава со наводниот нон-пејпер за промена на границите на балканските држави и нивна реорганизација по етнички линии, а медиумите како автори ги споменуваат највисоките словенечки функционери, што тие негираат.
„Секое мирно разидување, Хрватска до Дрина, Белград до Уна – тоа не доаѓа предвид. И во таа смисла, таа хартија е големо сра..е“, рече Милановиќ.
Словенечкиот претседател Борут Пахор на прес-конференција вчера рече дека е посветен на интегритетот на БиХ, се спротивставува на промена на границите на Балканот и ги повика сите земји во регионот да го забрзаат пристапувањето во ЕУ.
Премиерот Јанез Јанша, пак, кој се споменуваше дека му го предал овој документ на претседателот на Европскиот совет Шарл Мишел, негираше дека испратил некаква хартија во Брисел, а медиумите блиски до него велат дека обвинувањата се обид на домашната опозиција да го компромитираат пред Словенија да го преземе претседателството со ЕУ на почетокот на јули.
Милановиќ вели дека се надева дека неофицијалниот дипломатски документ не дошол од Љубљана затоа што, како што рече, објективно, многу ги почитува и мислам дека не се толку „удрени“.
За Јанша вели дека „тој може да биде „проблематично дете“ и уште нешто покрај тоа, но не верува дека стои зад вакво нешто.
Тој исто така не верува дека српскиот претседател Александар Вучиќ ќе застане зад идејата за обединување на Косово и Албанија.
„Значи, прво признавањето на Косово, што е веќе многу, а потоа и обединувањето на Косово и Албанија. За да дојде таа идеја од Белград, тоа е еден вид комбинаторика која ја надминува имагинацијата и сценаристите на најдобрите белградски крими -серии “, рече хрватскиот претседател.