Носителот на листата на кандидати за пратеници од ВМРО-ДПМНЕ и Коалицијата „За подобра Македонија“ во „петката“ Антонио Милошоски, денеска ја посети општина Дебарца и местата Требеништа, Волино, Ботун и Белчишта, и на жителите им претстави мерки од новата програма.
Во Белчишта Милошоски изјавил дека дел од програмата е фокусирана за подобрување на животот на младите, преку проекти за вработувања и отворање сопствени бизниси.
– За ВМРО-ДПМНЕ е многу важна политиката за младите во Република Македонија и затоа во нашата програма има неколку проекти кои се однесуваат на младите до 29 години. Нивно привилегирање по однос на кредити, субвенции, вработување и одредени заеми за да може да почнат сопствени бизниси. Најдобриот начин за да се задржат младите во своите родни места во Република Македонија, без разлика дали е мала или поголема општина, е отворање нови работни места, истакнал Милошоски.
– ВМРО-ДПМНЕ тоа ќе го прави на два начина – прво со привлекување странски инвестиции и второ – со отворање и отпочнување капитални инфраструктурни проекти, за секој човек кој има добро образование и струка ќе има прилика да си го најде своето работно место и ангажман, додал носителот на листата на ВМРО-ДПМНЕ во ИЕ 5, кој денеска е во посета и на општината Пласница.