Антонио Милошоски од ВМРО-ДПМНЕ моментно е во Полициска станица Центар каде поднесува пријава против Валмир Азири од ДУИ, државен секретар во Министерството за култура, кој преку социјалните мрежи се закани со физичко насилство.
Азири, вчера преку Фејсбук, повика на насилство, а се закани кон сите кои тој ги смета за „антиалбанци“.
„Антиалбанец како Антонио Милошоски заслужува повеќе. Мина времето на продавачите на магла. Новите генерации Албанци ќе им ги скршат рацете и нозете на сите што ќе се обидат да ги омаловажат Албанците“, напиша Азири на Фејсук во реакцијата по вчерашниот инцидент на собраниската Комисија за европски прашања на која претседателот Арбр Адеми, во еден момент, почна да фрла предмети кон опозицијата.
Азири во меѓувреме го избришал својот пост, но е веќе пренесен од многу медиуми, а воедно, МВР може со офоцијално барање упатено до Фејсбук (Мета) преку ајпи адреса да го добие постот како материјален доказ.