Дополнителниот заменик-министер за информатичко општество, Александар Кирацовски денеска на прес-конференција обвини дека министерката за информатичко општество и администрација, Марта Арсовска Томовска вршела притисок врз административните службеници за да не му достават материјали.
– Откако ја објавив намерата на власта да казни и избрка од работа, стотици административци, министерката против-законски побарала од вработените во Министерството веднаш да запрат со доставување документи што ќе ги побарам јас или мојот кабинет, изјави Кирацовски.
„Ве известувам веднаш да запрете со било какво издавање на документи (оригинал/копија/електронски) од архивата на Министерството или од доделените предмети за работа на било кој од Вас, а кои содржат лични податоци, до вработените во кабинетот на дополнителниот заменик, како и до дополнителниот заменик лично“, се вели во документот кој Томовска им го испратила на вработените.
Таа потоа и укажува на администрацијата во Министерството дека тие можат по претходна достава до неа, потоа да му ги дадат на увид на Александар Кирацовски.
Таа ваквата наредба ја образложува со тоа што претходно надвор од просториите на Министерството за информатичко општество, на прес-конференција биле изнесувани оригинални документи кои потоа биле дистрибуирани до медиумите.
Тој најави кривична пријава против неа, доколку веднаш не го повлече дописот.
Во Законот за Влада се вели дека дополнителниот заменик-министер има право на неограничен пристап до сите акти, документи и информации што му се на располагање на министерот.
– Предупредувам дека министерката Арсовска Томовска со дописот до вработените во Министерството направила злоупотреба на службената положба и овластување и несовесно работење во службата, за што кривично се одговара, потенцираше дополнителниот заменик кој ги охрабри сите вработени во Министерството и администрацијата да не потклекнуваат на незаконски известувања.